Hutan deng kali waci-peteley torang pe tampa barmain sekaligus uji nyali.
Mentari pica dari ufuk timur torang so balangkah kaki kaluar di muka pintu.
Kandati mama dusu deng rotan torang p niat so bulat, hari ini harus ada carita.
Hutan rimbah, lautan luas deng pesisir pante sampe bosan lia torang pe muka yang malawang deng tra badengar ini.
Di hutan, burung-burung deng buah matoa so menanti, afen(cai) katapel deng baku pangge kong torang kadara, bajalan tanpa alas kaki layaknya orang ada nyali, sambil bacarita kong pica tatawa karna so baku gara, sampe ada yang baku lae karna tara tarima bae.
Pohon-pohon manari karna torang hadir kase ilang sunyi.
Ada yang manangis karna so tara tau jalan pulang.
Ada yang tapotong deng jatong sampe babadara.
Juga ada cinta deng kasih yang selalu tatancap dihati sampe bawa mati.
Keringat deng tanda kaki tacucur dimana-mana, so jadi kenangan yang tra akan torang lupa.
Mentari somo tenggelam di barat satu-satu dari torang so maso dalam rumah
Mama deng papa so tunggu di ruang tamu, pasang muka mara deng rotan di tangan.
Sekarang! jangankan sandiri, banya orang saja torang so tako mo maso utang la tanam dodoso.
Peteley, 17 Agustus 2024
Penulis: Yasim Majid
“Usut tuntas kasus pembunuhan di Halmahera Timur dan Halmahera Tengah, lindungi masyarakat petani dikebun”
